KALIBO, Aklan–Target makaron it ginbilog nga Cityhood Committee it Sangguniang Bayan it Kalibo nga matutukan kung paano iduso ro pagiging siyudad it Kalibo.
Raya hay sa pihak it ginaduso nga sangka hagna ni Aklan 1st District Congressman Engr. Carlito Marquez para i-convert ro tanan nga capital town it mga probinsya nga maging siyudad.
Suno kay Kalibo Sangguniang Bayan member Philip Yerro Kimpo nga nagaeaum sanda nga otomatikong maeakip ro Kalibo nga ma-convert bilang City apang padayun gihapon nanda nga pagatun-an ro iba pang pamaagi agud nga maging siyudad ro banwa.
Mag-euwas kara, plano man nanda nga magbilog it sangka technical working group ag lobby group nga nakabase sa Manila.
Ro trabaho sigon it lobby group hay magpresenta it mga datus ag proposal sa mga law makers.
Dugang pa ni Kimpo nga antes matapos ro buean it Pebrero hay uman sanda nga magapatigayun it pueong agud nga talakayon ro ibang mga tikang.
Aminado man raya nga maabu pang kinahang-ean taw-an it igtueopangod ag ma-improve sa Kalibo agud nga maka-engganyo it maabu nga investors kamana man nga makaangkon it mas manami nga serbisyo.
