KALIBO, Aklan — Uman nga nagpatigayon it clearing operation ro lokal nga gobyerno ag mga kapulisan sa bilog nga banwa it Kalibo.
Raya hay ginpangunahan ni Sangguning Bayan member Matt Guzman , Chairman it Committee on Transportation.
Suno kay SB member Guzman nga antes pa man ro mandu ni Pangueong Rodrigo Duterte hay gin-umpisahan eon nanda ro clearing operation partikular sa palibot it Kalibo Public Market hasta sa kahabaon it Toting Reyes ag Mabini Sts. sa banwa it Kalibo.
Ko Biyernes nga adlaw hay natigayon man nanda nga malimpyuhan ro kahabaon it Archbishop Reyes ag Pastrana Sts.
Nagapasaeamat man imaw sa memorandum circular it pangueo bangud nga nakaangkon it ngipon ro andang aksyon.
Madumduman nga ginlibot ag ginlimpyuhan it Kalibo Police Station ag Kalibo Auxiliary Police ko nagtaliwan nga adlaw ro nasambit nga mga kalye nga naga tuyo nga malikawan ro paggutok it trapiko ag mahimos ro mga vendors nga naga-pwesto partikular sa mga sidewalk ag karsada.
Nasayuran nga nagpaguwa it 60 diyas nga taning ro Department of Interior and Local Government ukon DILG sa mga mayors ag barangay officials agud nga limpyuhan ag boe-on sa andang mga lugar ro mga kalhit, basura ag maskin ro mga sabeag sa daean.
Ginpasiguro man nana nga pagatutukan ro iba pang kalye nga kinahangean nga ipaidaeum sa clearing operation nga kon sa siin hay amat-amat ro andang operasyon bangud sa kakueangan it KAP personnel.
