KALIBO, Aklan—Nagapadayon ro clearing operation it Israeli forces sa southern part it nasyon nga apektado it pambomba it mga teroristang grupo.
Suno kay Bombo International Correspondent Benjamen Nepomuceno, sangka caregiver sa Jerusalem, Israel nga ginatos eon ro namatay sa nasambit nga pag-atake nga ginakaeakipan it mga sibilyan, soldado ag linibo eon man ro naninahan.
Ro mga Israeli hay sanay eon sa gyera apang uwa sigon nanda ginaeauman nga umabot mismo sa Jerusalem bangud nga masaming hasta eamang ro inaway sa border.
Ginpahayag dugang nga mga eopok it rocket eamang ro andang masami nga nababatian sa nasambit nga syudad kon may inaway apang makaron hay nakaabot eon mismo sa nasambit nga lugar ro rocket.
Suno pa kay Nepomuceno, kada oras naga-alarm ro andang cellphone bilang patimaan nga may mga naga-eopad nga rocket nga eubus nga mapeligro sa tanan.
Sa sueod it siyam nga dag-on nga pagtrabaho sa nasambit nga nasyon nga nakaeksperyensya raya it gyera, makaron eamang imaw nakaangkon it kahadlok bangud nga may mga sympathizer sa sueod ro militanteng Palestinian kon sa siin ro mga tawo sa kalye hay ginapamatay.
