Magaumpisa eon ro tatlong buean nga ‘closed fishing season’ sa mga isdang mackerel ag sardinas sa pilang mga kaeawran sakop it Pilipinas.
Sa naaminhan-nasidlangan it Palawan, pagaumpisahan eon ro implementasyon kara makaron nga November 1, 2024.
Sa Visayan Seas ag Zamboanga Peninsula, magaumpisa ro tatlong buean nga pagbawae magpangisda it nasambit nga klase it isda sa November 15, 2024.
Ro mga nasambit nga lugar hay ro nagaserbeng pangitlogan it mga isdang mackerel ag sardinas rason nga ginaprotektahan raya it gobyerno bilang kaparte it conservation effort sa mga nasambit nga isda sandig sa Republic Act No.4003 ukon mas kilaea bilang Fisheries Act.
Ginpasiguro it Department of Agriculture(DA) ro bastante nga isda sa kasagsagan it tatlong buean nga closed fishing season, kaibahan eon kara ro pag-import it pilang metriko tonelada it galunggong bilang dugang nga supply sa mga local market.
