KALIBO, Aklan—Naghiwat it marathon nga bukas sa tanan bilang parte it closing ceremony it Paris Olympics 2024.
Raya ro pahayag ni Bombo International Correspondent Maryden Araneta sa Paris, France.
Strikto man ro ginapatuman nga seguridad it gobyerno it Paris, France sa nagahilapit nga closing ceremony it Paris Olympics 2024.
Himuon sigon ro closing ceremony sa Stade de France kun siin limitado ro magiging audience kumpara ku opening ceremony ag raya hay may kaeakip nga ticket nga nagakahaega it 600 Euros.
Mapahaom it performance dancer, acrobats ag circus dancers ro organizers kun siin may mga sikat man nga personalidad nga maga-perform.
Tanan nga gusto magpalitrato sa mga atleta hay mahimo sigon magbisita sa Champion’s Park.
Samtang, nag-eutaw gid ro pangaean ni Stephen Curry sa pagdaog it sa USA Men’s Basketball kontra France.
Dugang pa nana nga napabilib man imaw ku mga atleta it Pilipinas bangud nga bisan maisot eamang ro nasyon hay uwa nagpa-ulihi kun siin nga gapati imaw nga raya hay sangka eksperyensya sa mga atleta para magbawi sa masunod.
Pagpakigbahin ni Araneta nga nangin manami ag bilib man imaw sa nangin performance nanday Bianca Pagdanganan ag Dottie Ardina ro Filipina golfers it nasyon.
Apisar sigon nga nangin isyu ro ginpaguwa nga video ni Ardina parte sa kakueangan it uniform.
Malipayon man si Araneta sa anang mga hinimuan bilang sangka international correspondent it Bombo Radyo Kalibo sa Paris, France ag maabo ro anang natun-an sa sports ag anang nasayuran ro mga trabaho it sangka media.
Masayuran nga igapasa eun man ro Olympic Torch sa masunod nga magahost it Olympics sa Los Angeles.
