Ginpaguwa ni International Criminal Court (ICC) Senior Trial Lawyer Julian Nicholls ro mga co-perpetrators sa patayan sigon sa tyempo it pagpanerbisyo bilang alkalde it Davao City ni dating Pangueong Rodrigo Duterte.
Sa unang adlaw it confirmation of charges hay ginpakita nana ro papel ni Senator Ronald “Bato” Dela Rosa nga imaw ro nagserbing hepe it Davao City Police Office kato.
Samtang si Senator Christopher “Bong” Go hay naging special assistant ag adviser kato ni Duterte.
Kaibahan man nga ginpangaeanan kara sanday dating Davao police chief Vicente Danao, dating National Bureau of Investigation (NBI) Davao Regional Director Dante Gierran ag si Atty.Vitaliano Aguirre II.
Sa Document Containing the Charges (DCC) hay ginsumite it prosecution nga ginpaguwa mat-a it ICC ko nagtaliwan nga mga dominggo kon sa siin sanday Go, Dela Rosa, Danao, Gierran ag Aguirre hay ginpangaeanan bilang co-perpetrators sa pagplano para daeayon nga ma-neutralized ro mga kriminal sa pinaagi it pagpatay sa mga raya.
Kaibahan man sa dokumento bilang co-perpetrators sanday dating PNP chief Oscar Albayalde ag Isidro Lapena.
Dugang pa ni Nicholls nga may sistema nga ginasunod kato ni Duterte kon sa siin nabilog ro Davao Death Squad (DDS).
Ro papel sigon it mga co-perpetrators hay sanda ro nagapapanaog it mando halin kay Duterte para ipatigayon ro pagpatay nga ro mga miyembro hay mga kapulisan kamana man mga hitmen nga sanda ro nagahimo it pagpatay.
Sa ikaywang adlaw it pagpamati hay tig sambilogon sigon it ICC prosecutors ro pilang mga detalye it mga kasabwat ni Duterte sa ginpatuman kara nga war on drugs.
