KALIBO, Aklan—Negatibo eon sa paralytic shellfish poison ukon red tide toxin ro coastal waters it Altavas, Batan ag New Washington sa Batan Bay sa probinsya it Aklan.
Raya hay base sa resulta it red tide monitoring it Bureau of Fisheries and Aquatic Resources ukon BFAR ag lokal nga gobyerno matapos ro tatlong magkasunod nga dominggo nga nagpatigayon it pag-test sa water sampling sa nasambit nga lugar.
Angot kara, ginpahayag ni Marlon Magbiro, Municipal Agricultural Officer it LGU New Washington nga ginkalipay nanda ro abiso nga ginpaguwa it BFAR bangud nga makabalik eon sa andang pagbaligya ro mga negosyante.
Ginaeauman nga mabuhi it uman ro talabahan village sa Brgy. Tambak, New Washington bangud nga sambilog ro taeaba sa mga ginadayo it lokal nga turista sa nasambit nga lugar.
Mag-eowas kara, eowas eon man nga kan-on ro tahong ag iba pang klase it shellfish.
Madumduman nga temporaryong ginbawaean ro pagbaligya it nagkaeain-eain nga klase it shellfish matapos nga naapektuhan raya it red tide toxin nga nagtuga man it kalugihan sa mga negosyante eon man sa may mga taeabahan ag tahongan.
