KALIBO, Aklan—Pangkabilugan nga naging maayos ro pagdihon it kandidatura sa bilog nga probinsiya it Aklan.
Raya ro naging assessment it Commission on Elections ukon Comelec-Aklan sa pagtapos it filing it Certificates of Candidacy nga nag-umpisa ko Oktobre 1 ag nagtapos ko adlaw it Martes, Oktubre 8 para sa 2025 National and Local Elections.
Suno kay Chrispin Raymund Gerardo, tagapaghambae it Comelec-Aklan nga mabahoe ro andang pagpasaeamat sa mga pulitiko ag pumueuyu kamana man sa mga law enforcement agencies nga nagpatuman it hugut nga seguridad sa mga gintaeana nga venue para sa COC filing.
Kaibahan sa mga nagdihon it COC hay ro personalidad nga naghalin sa mga pamilya it politiko.
Samtang, uman nga nagpadumdum si Gerardo nga indi eon nanda pagapasugtan ro substitution it mga kandidato pagkatapos it October 8.
Pwede eamang suno kana ro withdrawal apang indi eon pagapasugtan ro substitution.
Owa man sigon it makabig nga nuisance candidate sa probinsiya nga nag-file it COC .
Ginklaru man nana nga ro tanan nga mga nagdihon it kandidatura hay puro aspirante pa eamang ag pagakabigon nga official candidate sa pag-umpisa it campaign period ukon 90 days antes ro eleksyon para sa nasyunal ag 45 days para sa mga local candidates.
Sa pihak nga parte, base sigon sa andang record, kabilugan nga 375 nga mga kandidato ro nag-file it andang COC sa bilog nga probinsiya umpisa sa magapadaeagan sa gobernador hasta sangguniang bayan members.
