BUSINESS News–Nagsanib-pwersa ro Bangko Sentral ng Pilipinas (BSP) ag tatlong mall sa nasyon para magbutang it Coin Deposit Machines kabaylo it shopping vouchers ukon digital wallet credits.
Raya hay agud nga mas maka engganyo pa it mga tawo nga gastuson ro andang mga sinsilyo nga kaparte it andang coin recirculation bid.
Kadungan it paglunsar it Coin Deposit Machines, ginpahayag ni BSP Governor Felipe Medalla nga tuyo it programa nga masabat ro artificial coin shortage sa pilang lugar sa nasyon ag bawasan man ro pagkinahangean nga maghimo pa it mas maabu nga mga sinsilyo.
Suno kana nga owa it shortage it coins sa nasyon apang padayun nga ginabalewala it mga tawo ro mga raya ag gina aywan eamang sa andang mga baeay ukon ginatipon.
Suno kay Medalla, dapat hay nagapaguwa it coins ro mga tawo sang beses sa sang domingo apang bangud nga mas abu ro nagatago kara sa andang baeay , ro rate of recirculation hay nagabuhay it sang beses sa sueod it 6 nga buean.
Sa raya nga pamaagi , kinahangean eamang nga ibutang it depositors ro andang GCash account number sa CoDMs agud nga ro kantidad it coins nga ginbutang sa machine hay maibutang sa andang electronic wallets.
Ro minimum amount nga maibutang sa e-wallet account hay kapin sa P100 pesos samtang ro maximum amount man hay depende sa limit it wallet.
Nakataeana pa nga magbutang it 25 nga makina sa pilang branch it andang partner establishments sa Greater Manila Area ro BSP hasta Agosto it makaron nga dag-on.
Paga-usisaon man ni Medalla ro kadaeag-an it nasambit nga programa bago magdesisyon kun pagadugangan pa ro numero it CODMs maging sa ibang rehiyon.
