KALIBO, Aklan—Haum eon ro cold chain storage facility it lokal nga gobyerno it Kalibo nga pagabutangan it Coronavirus vaccines.
Suno kay Executive Assistant to the Office of the Mayor Mr. Basil Tabernilla nga raya hay nahamtang sa state-of-the-art nga birthing facility it munisipyo sa may N. Roldan St., Kalibo.
Sa kamatuoran hay nakataeana eon man suno kana nga mag abot ro mga kinahangeanon nga kagamitan para kara nga nagakabagay sa astrazeneca vaccines nga gin-order it LGU-Kalibo.
Natigayon eon man sigon raya nga ma-inspection ag pasado man ro lugar sa standard nga gintaeana it Inter-Agency Task Force, Department of Health ag World Health Organization.
Gindugang pa ni Tabernilla nga preparado eon ro munisipyo sa tayuyon nga pagpatigayon it vaccination program.
Nasayuran nga nagtaeana ro LGU it kapin sa 50 milyon pesos para sa pagbakae it Covid-19 vaccines.
Haeos 70 porsiyento it populasyon it Kalibo ro target nga mabakunahan.
Owa it pieilitan suno kana ro pagpabakuna apang padayun ro andang panawagan nga magpabakuna bangud nga raya ro pinaka-epektibong pangsukoe sa COVID-19.
Sa pihak nga parte, maeapit eamang sigon ro storage facility sa gintaeana nga COVID-19 vaccination area nga ginaeakipan it gymnasium it Aklan Catholic College ag covered court it Kalibo Pastrana Park.
