KALIBO, Aklan–Hugut nga ginapatuman makaron ro Comelec ag enhanced vaccination checkpoint sa probinsiya it Aklan.
Raya hay kasunod it pagkuwestiyon it pilang motorista sa pag-usoy kanda it drivers license, OR-CR ag vaccination card kamana man nga gina-usisa ro andang utility box sa mga ginatukod nga comelec checkpoint.
Ginpaathag ni Chrispin Raymund Gerardo, tagapaghambae it Comelec-Aklan nga ro gun ban hay gindugang eamang sa pagpatigayon it regular nga checkpoint it mga otoridad.
Tuyo sigon kara nga masiguro nga rehistrado ro andang mga saeakyan ag owa it daea nga armas nga hugut nga ginabawae makaron nga election period.
Ginpaathag pa ni Gerardo nga bangud nga ro Aklan hay nakapaidaeum sa Alert Level 3, gina-usoy ro vaccination card agud nga masiguro nga puro bakunado ro mga nagabiyahe.
Gin-insister pa ni Gerardo nga ro gina-obra it mga otoridad hay para man sa kaeowasan it tanan.
