KALIBO, Aklan—Nagpagguwa it bag-ong memorandum ro Commission on Election (Comelec)-Aklan angot sa pagpaeawig it oras it mga gustong magpa-rehistro para sa 2022 national and local elections.
Raya hay kasunod it nakita nga pagnaba sa nailistang kaso it Coronavirus Disease 2019 ukon COVID-19 sa probinsya it Aklan.
Suno kay Election Officer Atty. Rommel Benliro it Comelec-Kalibo nga maga-umpisa eon ro bag-ong schedule it alas-8 it agahon hasta alas-5 it hapon halin Lunes hasta Biyernes sa tanan nga opisina it Comelec bilog nga probinsya.
Tuyo kara nga mataw-an it bastanteng oras ro mga pumueoyo nga gustong magpa-rehistro para sa nagahilapit nga eleksyon.
Gindugang pa ni Atty. Benliro nga apisar nga holiday makaron nga adlaw bangud sa pagtapos it Ramadan hay nagapabilin nga bukas ro mga opisina it Comelec para magtao it serbisyo sa mga pumueoyo.
Samtang, ginalimitahan man sigon nanda it hasta 70 katawo ro andang ginabaton kada adlaw kamana man nga hugut nga ginapatuman sa andang taeatapan ro pagsunod sa health and safety protocols.
Ro ulihing adlaw it pagpa-rehistro hay hasta Setyembre 30, 2021.
