KALIBO, Aklan–Nagpadumdom ro Commission on Elections (Comelec) sa mga pumueoyo angot sa igapatuman nga liquor ban umpisa Mayo 8 hasta sa mismong adlaw it eleksyon Mayo 9, 2022.
Suno kay Crispin Raymund Gerardo, tagapaghambae it Comelec-Aklan nga tuyo kara nga mapreserba ro kaayusan ag katawhayan sa adlaw it botohan.
Nasayuran nga ro pagbaligya ag pag-inom it aeak sa mga nasambit nga petsa hay makabig nga sangka election offense.
Ro sin-o man nga madakpan nga mag-eabag kara hay posibelng makulong it indi mag-eampas sa an-om nga dag-on ag indi magnaba sa sang dag-on.
Nakasueod ro liquor ban sa Comelec Resolution 10746 nga ginpagguwa ko Disyembre 2021.
Ro mga establisyimento man nga duly certified it Department of Tourism hay pwedeng mag-apply it exemption apang ro mga dumueo-ong turista eamang ro pagapasugtan nga mag-inom.
May gahum man ro Comelec nga bawion ro nasambit nga exemption anumang oras kung makabaton sanda it reklamo kontra sa establisyimento.
Sa pihak nga parte, nagpaandam man ro komisyon sa mga kandidato nga hugut eon nga ginabawaean ro pagkampanya umpisa sa adlaw it Dominggo, Mayo 8.
Tanan sigon nga klase it pagpangampanya kapareho it pagpanupod it mga printed t-shirt, face mask, kaeo ag iba pang bagay nga may pangaean ukon itsura it pulitiko hay hugut nga ginabawae.
Samtang, agud nga mas mapadali ro pagboto sa eleksyon mas mayad kung temprarno nga mag-adto sa kada polling precincts ro mga pumueoyo.
Makabulig man sigon kung may kodigo ukon listahan eon it mga igaboto.
Ginpadumdom pa ni Gerardo nga bawae ro pagpicture sa balota ag resibo sa sueod it kada presinto.
