KALIBO, Aklan — Ginpasiguro it Commission on Elections (Comelec)-Aklan nga haum eon sanda para sa nagahilapit nga 2025 midterm elections.
Suno kay Chrispin Raymund Gerardo , tagapaghambae it Comelec-Aklan, naayos eon nanda ro tanan nga kinahangean sandig sa ginpaguwa nga calendar of activities it central office.
Padayun man ro pag engganyo it taeatapan sa publiko nga magparehistro eon bangud nga owa it extension nga igatau para kara ag magapabilin nga hasta eon lang raya sa September 30 it makaron nga dag-on .
Pagkatapos it registration suno kana, paga-umpisahan eagi ro “filling” it certificate of candidacy (COC) it mga magapadaeagan nga kandidato, umpisa October 1 hasta October 8.
Iga-finalize pa sigon it andang taeatapan ro mga posibleng venues nga pagahiwatan sa pagdihon it COC .
Uman kara nga ginklaru nga ginabawae eon it komisyon ro substitution it kandidato matapos ro ulihing adlaw it pagdihon it Certificate of Candidacy.
Sa makaron hay padayun ro andang pag-imbita it mga manugturo nga haum nga magserbisyo sa eleksyon bilang Board of Elections Inspectors ukon BEIs.
