KALIBO, Aklan—Nagapanawagan ro Commission on Elections ukon Comelec-Aklan nga suportahan ro mga ginapatigayon makaron nga ‘Unity-Walk ag Peace Covenant Signing’ sa nagkaeain-eain nga banwa bilang pagsabat sa pag-angkon it malinong ag maayos nga barangay ag sangguniang kabataan elections sa maabot nga Oktubre 30.
Suno kay Chrispin Raymund Gerardo, tagapaghambae it Comelec-Aklan nga importante nga makatambong sa mga makarondaya nga event ro mga kandidato sa pagka punong-barangay ag sa sangguniang kabataan kaibahan ro mga sangguniang barangay members ag SK kagawad halin sa nagkaeain-eain nga barangay sa Aklan.
Nasayuran nga pilang banwa eon ro nakapatigayon it peace covenant signing ag unity walk kaibahan ro PNP ag iba pang natungdan nga ahensiya it gobyerno nga miyembro it municipal joint security command center.
Angot kara, uman nga ginpadumdum ni Gerardo nga hugut pa nga ginabawae ro premature campaigning kamana man ro pagpangampanya sa mga personal nga social media accounts.
Engkaso nga mapamatud-an ro pageabag hay pwede pang paandaman anay ro kandidato ag kon padayun gihapon sa nasambit nga hilimuon hay posibleng magresulta sa diskwalipikasyon ukon makasuhan hasta nga makulong ag owa eon it kahigayunan pa nga makapanerbisyo sa anuman nga posisyon sa gobyerno.