KALIBO, Aklan—Sangkiri nga tiempo eon lang ro nabilin para sa pagparehistro it mga botante rason nga uman nga ginkalitan it Commission on Elections ukon Comelec-Aklan ro kahigayunan agud nga engganyuhon ro tanan nga magpasakop sa demokratikong proseso it eleksyon.
Suno kay Crispin Raymund Gerardo, tagapaghambae it Comelec-Aklan nga ulihing adlaw eon it pagpa-rehistro sa Oktubre 30, Sabado nga adlaw.
Sandig sa section 6 it Comelec resolution 10549, igapatuman sa ulihing alaw it pagparehistro ro pagbaton it mga aplikante nga nakapila pa sa sueod it 30-meter nga radius halin sa taeatapan it komisyon pag-abot it alas-5 it hapon.
Samtang, uman nga nagpanawagan ro comelec nga indi ipatuman ro ‘mañana habit’ ukon ro batasan nga nagapabuyan-buyan ukon nagapahin-aga pa maskin nga may kahigayunan man nga mahimo raya it temprano.
Gindugang pa ni Gerardo nga maskin sanda hay nakibot matapos nga mas maabu pa makaron ro mga bag-ong nagapa-rehistro kun sa siin sa sueod it napueong adlaw, umpisa nga gin-extend ro registration ko Oktubre 11 hay masobra sa sang libo ro dugang nga nagpa-rehistro.
Mag-eowas sa nagapadayun nga voters registration, kaibahan pa sa andang ginapahauman hay ro substitution it mga kandidato hasta sa Nobyembre 15.
