KALIBO, Aklan—Padayun ro paglibot it Commission on Elections ukon Comelec agud nga sayuron kon nagasunod ro kampo it mga kandidato sa sueundanan sa pagbutang it campaign materials.
Raya hay kasunod it pagbak-eas it mga illegal poster ag campaign materials it mga kandidato nga owa nagasunod sa guidelines.
Suno kay Crispin Raymund Gerardo, tagapaghambae it Comelec-Aklan, dapat nga ro mga posters hay nakakabit sa common poster area nga gintaeana it komisyon ag may tamang sukat.
Bangud nga sangka common poster area eamang ro ginbutang sa kada barangay rason nga napipilitan suno kana ro mga kandidato nga magbutang sa mga private properties it andang mga tagasuporta.
Apang, ginklaru ni Gerardo nga dapat nga may nagakaigo nga permiso sa tag-ana ro nagakabit ag nagasunod gihapon sa tamang sukat nga 2 feet by 3 feet.
Gina-abisuhan sigon nanda ro mga tag-ana it private properties nga sanda ro magkakas it tarpaulin ag pagkatapos hay ginaboe-an it litrato.
Sa uman sigon nanda nga pagbalik ag owa gihapon ginbo-oe ro poster hay magapadaea pa sanda it sueat sa tag-ana ag engkaso nga padayun nga magapakamatig-a hay igareport nanda raya sa law department it andang national office.
Sa pihak nga parte, bawae gihapon suno kana ro public display of affection ukon PDA it mga kandidato sa mga botante.
Owa sigon ginapasugtan ro pakikipaglamano, pag-selfie, pagharu, paghakos ag iba pa sa mga kandidato sa kasagsagan it mga campaign rallies bilang pagdahan sa COVID 19.
