KALIBO, Aklan—Uman nga gin-engganyo it Commission on Election ukon COMELEC-Aklan ro publiko nga magparehistro agud nga makaboto sa paeaabuton nga eleksyon.
Raya hay matapos ro ginpaguwa nga anunsiyo it COMELEC angot sa uman nga pag-resume it voter registration para sa May 2022 national ag local polls umpisa makarun nga adlaw it Lunes, Enero 4, 2021.
Suno kay COMELEC-Aklan spokesperson Edwin Raymund “Dodoy” Gerardo nga ro pagboto hay imaw ro nagapakita it pagiging Filipino, pagpartisipar sa demokrasya, ag pagpili it gustong liderato.
Ginapahayag dugang nga pwede pang magparehistro ro mga qualified nga indbidwal hasta sa Setyembre 2021.
Apang ginaeaygayan ro mga raya nga magsunod sa ginapatuman nga health protocols kontra COVID-19 kapareho it pagsuksok it face masks ag face shields pati eun man ro pag-obserba it physical ukon social distancing.
Bukas man ro mga opisina it Comelec umpisa Lunes hasta Huwebes umpisa alas-8:00 it agahon hasta alas-3:00 it hapon.
Engkasong may madasig man sigon nga internet connection hay pwedeng magfill up it application forms sa online app nga iRehistro ro mga aplikante.
Kung owa it internet ukon data connection hay pwedeng magpadueong sa opisina it COMELEC ro ginikanan it mga aplikante nga gustong magparehistro ag magpakita eamang it valid I.D it andang unga agud mataw-an it registration form.
Sa pihak kara, kinahangean man sa gihapon nga magpadueong it personal ro mga registrants sa andang local Comelec offices ag dapat man nga magdaea it tatlong kopya it printed online application forms.
