KALIBO, Aklan—Uman nga ginklaro it Commission on Elections (Comelec) nga magatapos eun makarun nga adlaw, Nobyembre 15 ro substitution bangud sa withdrawal.
Suno kay Comelec-Aklan supervisor, Atty. Roberto Salazar nga hasta alas-5 it hapon makarun nga adlaw hay bukas ro taeatapan it Comelec para sa substitution.
Sa pihak kara, ginpahayag man ni Atty. Salazar nga owa pa it may nagpadueong sa andang opisina para magfile it withdrawal hasta kaina it agahon mag-euwas sa mga dati eun nga nagpangayo eamang it form.
Dugang pa kara nga umpisa pa ko mga nagtaliwan nga mga eleksiyon hay nagapabilin nga matawhay ag maayos ro daeagan it pamulitika sa probinsya ag owa it mga mga nagakatabong mga kontrobersiyal nga substitution ag withdrawal kapareho sa national level.
Nasayuran nga sa idaeum it Resolution No. 10717, ginpahayag it Comelec nga ro aspirant maghalin sa duly registered political party ukon coalition nga namatay, nag-atras, ukon nadiskwalipa sa maskin anong rason matapos ro ulihing adlaw it pagdihon it COCs hay puweding bayluhan it aspirant maghalin sa parehong political party ukon coalition.
