KALIBO, Aklan–Uman nga nagpadumdom ro Commission on Elections (Comelec)-Aklan sa publiko nga maging haum sa pagboto para sa May 9, 2022 national and local elections.
Ginlaygayan ni Crispin Raymund Gerardo, tagapaghambae it Comelec-Aklan ro mga pumueoyo nga magpahaum it kodigo ukon listahan it mga kandidato nga igaboto.
Mag-euwas kara, dapat sigon nga makaron pa eamang hay nasayuran eon it kada pumueoyo ro andang natungdan nga polling precinct.
Samtang, nagatao man sigon ro komisyon it pribilihiyo sa mga Senior citizen, Person with Disabilities ag indibidwal nga indi kantigo magsueat ukon magbasa nga makaangkon it assistor.
Ro pwede eamang sigon nga mag-assist sa nasambit nga mga indibidwal hay ro andang pamilya, paryente ag kaibahan sa sueod it baeay.
Sa pihak kara, hugut man nga igapatuman it Comelec ro pagsunod sa minimum health standards kung siin may gintaeana sigon sanda nga health and safety officer nga magalibot sa kada presinto.
Ro mga indibidwal sigon nga makaangkon it mataas nga temperatura hay pagadaehon sa isolation polling precinct para idtu magboto.
Nagpadumdum man si Gerardo sa mga kandidato nga likawan ro tanan nga klase it pagpangampanya agud nga indi sanda makaangkon it problema.
Sa kabilugan, ginpabugae kara nga syento porsyento eon nga haum ro komisyon para sa pagahiwaton nga eleksyon hin-aga, adlaw it Lunes.
