KALIBO, Aklan—Uman nga nagpanawagan ro Commission on Elections ukon Comelec-Aklan nga taw-an it oras samtang temprano pa ro pag-agto sa andang mga taeatapan agud nga magpa-rehistro
Raya ro ginpahayag ni Atty. Rommel Benliro, Municipal Comelec Officer it Kalibo eabi eon sa mga pamatan-on nga magiging 18 anyos sa tiempo nga mag-abot ro Mayo 9, 2022.
Bangud suno kana sa ginaexperiensiyahan nga covid 19 pandemic, gina-engganyo kara ro tanan eabi eon ro mga bag-ong botante nga likawan ro last-minute syndrome ukon ro pagparehistro sa ulihing adlaw it registration agud nga indi makaangkon it pagdueutdutan it mga tawo.
Kinahangean eamang suno kana nga magdaea it photocopy it birth certificate ag nagakaigo nga ID nga pagabasehan it presenteng address.
Antes man nga mag-agto sa andang taeatapan, dapat anay nga pil-apan ro COMELEC Registration Form nga pwedeng ma-download.
Pwede man sigon ro walk-in sa andang opisina, umpisa Lunes hasta Huwebes alas-8 it agahon hasta alas-3 it hapon.
Samtang, hugut man nga ginapadumdum ni Atty. Benliro nga sundon ro ginapatuman nga health protocols kapareho it pagsuksok it facemask, face shield, pag obserba sa social distancing pati man ro pagdaea it kaugalingon nga ballpen.
May gintaeana man sanda nga washing area ag nag provide it alcohol sa guwa it andang opisina mag-eowas pa nga adlaw adlaw nga gina dis-infect ro andang opisina.
Tuyo kara nga malikawan ro pagtaeapnan it virus tuga it COVID-19.
Maskin suno kana imaw hay nagabantay it mga tawo nga nagasueod sa andang taeatapan kun sa siin sa makaron hay amat-amat eon nga naga-inabu nga naga-average makaron sa 50 kada adlaw.
Samtang, mag-eowas sa pagbaton sa mga rehistro it mga bag-ong botante, nagabaton man sanda it mga transaksyon sa reactivation it mga dati eon nga mga botante ag mga change of residency cases.
Pila sa mga ginapangayo nga dokumento hay ro water ag electric bills agud nga makita ro presenteng address
Ginapasugtan man ro mga corrections of voters’ entries, correction of names ag change of status apang kinahangean sigon nga may kaibahan raya nga mga dokumento kapareho it court order, birth ukon marriage certificates.
Ro mga nagpa-rehistro hay igapaidaeum pa sa election registration board hearing.
