KALIBO, Aklan—Bukon pa it tapos ro desisyon it Commission on Elections ukon Comelec sa kaso ni presidential candidate Ferdinand Marcos Jr.
Raya ro ginpahayag ni Atty. Plaridel Morania, sangka batikang abogado sa aklan matapos nga eubusan eon nga ginbasura it Comelec 1st Division ro tatlong gintingub nga disqualification cases nga ginpasaka kontra kay Marcos.
Suno kay Atty. Morania nga may limang adlaw pa ro mga petitioner nga ginaeakipan it Akbayan Citizens’ Action Party, Martial Law survivor Bonifacio Ilagan ag Abubakar Mangelen nga dating chairman it Partido Federal ng Pilipinas agud nga i-apela ro desisyon.
Gindugang pa ni Atty. Morania nga pwede pa sanda nga magdihon it andang Motion for Reconsideration sa desisyon.
Base sa Comelec rules of procedures ro motion for reconsideration hay pagapamatian it comelec en banc ukon mga commissioners.
Anuman ro maging resulta it MR ag desisyon nga igapaguwa it komisyon pwede sa gihapon raya nga daehon sa korte suprema.
Madumduman nga sa 40-panig nga resolution nga ginsueat ni Comelec Commissioner Aimee Ferolino, ginbasehan nanda ro owa pag-eakip it Court of Appeals it penalidad nga ‘perpetual disqualification from holding public office’ sa andang desisyong ibasura ro mga petisyon.
Raya hay angot sa desisyon it Court of Appeals sa kasong owa sigon pagdihon it income tax return ni Bong-Bong Marcos umpisa 1982 hasta 1985.
Ginpamilit pa sa resolution nga owa it moral turpitude sa kaso ag owa man it penalidad nga pagka-presu ro ginpapanaog kontra kay Marcos Jr.
