KALIBO, Aklan—Ginpasugtan eon it Commission on Elections ukon Comelec ro online nga pagpatigayon it reactivation it record it mga botanteng napas-eawan nga makaboto sa nagtaliwan nga daywang sunod-sunod nga eleksyon.
Suno kay Crispin Raymund Gerardo, tagapaghambae it Comelec-Aklan ag New Washington election officer nga tuyo kara it komisyon nga mabuligan ro mga vulnerable sectors kapareho it mga indibidwal nga may kapansanan kaibahan ro mga senior citizens nga bawae pa nga makaguwa it andang mga baeay.
Ro nasambit nga mga vulnerable sectors hay may kahigayunan nga makapadaea it andang registration forms pinaagi sa email it andang natungdan nga opisina it election officers.
Ginpahayag dugang nga ro mga botante eamang nga may biometrics records sa comelec ro ginapasugtan kara ag ro mga owa hay kinahangean man gihapon nga personal nga mag-agto sa ahensiya.
