KALIBO, Aklan—Agud nga makalikaw sa pagtaeapnan it Covid-19, hugut nga ginpadumdum it Commission on Elections ukon Comelec nga bawae ro nakasanayan nga beso-beso, paglamano, selfie, pagsueod sa mga baeay-baeay ag iba pang physical contact sa tiempo it kampanya.
Suno kay Chrispin Raymund Gerardo, tagapaghambae it Comelec-Aklan nga raya hay sandig sa ginpaguwa it komisyon nga ginakabig nga “new normal” campaign guidelines para sa mga kandidato sa Mayo 2022 nga eleksyon.
Sa nasambit nga patakaran suno kana hay nakaplastar man ro mga patakaran para sa in-person campaigning; pagpatigayon it political meetings, caucuses, conventions, rallies ag miting de avance; motorcades ag caravans kun sa siin bawae kara nga magtambong ro mga 18 anyos panaba ag 65 anyos pataas kamana man ro mga may comorbities.
Kinahangean sigon nga mapatuman kara ro social distancing.
Tanan sigon nga pagpangampanya hay kinahangean nga may una nga permit halin sa Comelec Campaign Committee.
Nagpanindugan si Gerardo nga ro anuman nga pag-eabag sa nasambit nga sueundanan hay makabig nga election offense nga may kaibahan nga penalidad nga sang dag-on hasta an-um nga dag-on nga pagkakulong.
Sa pihak nga parte, ginpadumdum it Comelec nga bawae nga magbutang maskin siin-siin eamang it mga campaign posters ag kon ginakabit raya sa mga private property, kinahangean nga may nagakaigo nga abiso halin sa tag-ana.
Ro sukat it mga poster nga ginapasugtan hay indi dapat nga mag-eampas sa 2 by 3.
Sa makaron nga teimpo suno kana hay masyadong importate ro media.
