KALIBO, Aklan — Nakataeana nga maga-convene ro gintukod it Commission on Elections (Comelec) nga bag-ong komite nga ginatawag nga “Kontra Bigay” agud nga suk-ean ro vote buying ag vote selling bilang pagpahaum sa midterm elections sa Mayo 12, 2025.
Ginaeakipan ro komite it mga representatives halin sa nagkaeain-eain nga regional, provincial, ag municipal agencies, kun sa siin ro andang obligasyon hay magpasaka it kaso kontra sa mga maga-eabag sa electoral rules.
Suno kay Chrispin Raymund Gerardo, tagapaghambae it Comelec-Aklan nga tuyo it komite nga masiguro nga mapasabat sa laye ro sin-o man nga madakpan nga nagahimo it mga ilegal gha aktibidad angot sa eleksyon.
Hilway ag kinamatarung suno kana it tanan nga mga kandidato nga magpangampanya, kun sa siin ro campaign period sa local candidates hay maga-umpisa eon sa Marso 28 basta nga sundon eamang ro Fair Election Act.
Samtang sa ginpaguwa nga Resolution No. 11104, ginapasugtan ro mga law enforcement personnel nga arestuhon ro mga vote buyers ag vote sellers nga owa it warrant kon sanda hay naaktuhan.
Ginpadumdum dugang sa publiko nga hugut nga ginabawae ro presensiya it mga local ag national candidates sa pagpanupod it bulig halin sa national government.
Dugang pa kara nga ro pagbutang it pangaean it mga pulitiko sa mga tarpaulin para sa mga proyektong pang-gobyerno hay owa man ginapasugtan bangud nga ginakabig raya nga sangka porma it election propaganda.
