KALIBO, Aklan—Uman nga gin-engganyo it Commission on Elections ukon Comelec ro publiko nga magpasakop sa pagahiwaton nga 2024 Voter Education and Registration Fair makaron nga adlaw it Martes, Marso 12 sa NVC gym sa Capitol Site Barangay Estancia, Kalibo.
Suno kay Atty. Christian Itulid, Comelec election officer IV it Comelec Kalibo nga ro nasambit nga aktibidad hay kaparte it andang information ag education campaign nga nagatuyo nga ma-edukar ro mga botante sa andang kinamatarung sa pagboto ag pag engganyo man sa mga pamatan-on nga magpasakop sa nagapadayun makaron nga registration.
Raya hay pagapangunahan sigon mismo ni Comelec chairman George Erwin Garcia.
Bukon eamang sigon it mga estudyante ro target kara kundi ro tanan nga mga botante.
Agud nga maging mas maeumo pa gid suno kana sa mga unregistered voters nga magatambong sa event, magahiwat man sanda it Register Anywhere Program ukon RAP kun sa siin ro sangka indibidwal hay pwedeng makaparehistro agud nga makaboto maskin nga siin man ro anang presenteng gina-istaran.
Ro tanan suno kana nga voters registration machines it 17 nga comelec offices sa aklan hay pagatipunon sa nasambit nga lugar.
Dugang pa ni Atty. Itulid nga pagatalayon sa voter education and registration fairs ro angot sa registration process, right to vote it sangka tawo, ag paalin nga mabatian ro andang boses pinaagi sa pagboto.
Ro mga unregistered apang qualified nga botante hay welcome sigon agud nga makaparehistro sa anuman nga taeatapan it Comelec kun sa siin ro registration hay magabuhay pa hasta sa Sept. 30, 2024.
Ro mga Comelec offices suno kana hay magabaton it applications para sa registration umpisa Lunes hasta Sabado eakip ro holidays, mag-eowas eamang sa March 28 hasta 30 para sa pagdumdum sa Holy Week.