KALIBO, Aklan—Nakataeanang magapatuman it mas hugut nga regulasyon sa campaign materials sa idaeum it “Operation Baklas” sa pag-umpisa it opisyal nga campaign period sa local candidates sa Marso 28, 2025.
Ginpamilit ni Atty. Christian Itulid, election officer it Commission on Elections ukon Comelec-Kalibo nga kaibahan ro iba pang natungdan nga ahensiya it gobyerno hay aktibo nanda nga pagapamaeson ro mga campaign materials nga owa nagasunod sa limitasyon it sukat ukon nakapaskil sa bukon it otorisadog public spaces.
Kadungan kara, nag apela man imaw it kooperasyon sa mga kandidato agud nga malikawan nga maeabag ro fair election act nga pwedeng maging rason it diskwalipikasyon.
Samtang, magapatuman man sigon ro Comelec it mas hugut nga tikang kontra sa pagbakae it boto ag pagbaligya it boto.
Pwede sigon nga mag report kara ro mga pumueuyu basta nga may nagakaigo nga litrato ag video bilang ebidensiya partikular sa Committee on Kontra Bigay.
Kaibahan man sa pagabantayan it komisyon ro pagpanupod it ayuda ukon bulig pinansyal , napueong adlaw antes ro eleksyon sa Mayo 12 bangud nga raya hay hugut nga ginabawae.
