KALIBO, Aklan—Nakataeana eon nga iga-distribute it Commission on Elections ukon Comelec Malay ro mga balota nga pagagamiton para sa Barangay ag Sangguniang Kabataan Elections sa Lunes, Oktubre 30.
Suno kay municipal election officer III Elma Cahilig it banwa it Malay nga makaron nga adlaw it Domingo it hapon hay iga-deliver nanda ro mga balota ag iba pang mga election documents sa natungdan nga mga barangay, kun sa siin igapa-safekeeping anay raya sa municipal treasurers office sa action center ag sa Lunes it alas-4:00 it aga-aga hay igaturn-over sa mga manugturo nga magaserbi bilang board of election inspectors.
Sa pihak nga parte, all set and ready eon ro mga magaserbisyo sa maabot nga eleksyon sa nasambit nga banwa.
Sa kamatuoran suno kana hay nakadeploy eon ro mga raya sa andang natungdan nga mga assignments.
Magatukod man it mga police assistance desk maeapit sa mga polling centers.
Ro banwa it Malay hay may kabilugan nga botante nga 41, 390 nga registered voter para sa barangay election ag 13,311 para sa SK voter.
Sa nasambit nga numero, ro may pinakamataas nga botante hay halin sa Brgy. Manocmanoc nga may kabilugan nga 12,822 nga voters.
Ro isla it Boracay hay may kabilugan nga voters nga 22,651 ukon 55% it voters sa banwa it Malay.
Ro mga indibidwal nga naga edad it 15 hasta 30 anyos hay makaboto para sa SK elections, samtang ro masobra sa 18 anyos pataas hay makaboto sa barangay elections.
Sa pihak nga parte, hugut sigon nanda nga igapatuman ro liquor ban rules makaron nga adlaw.
Pagabuksan ro mga polling precinct alas-7:00 it agahon hasta alas-3:00 it hapon.
Magatukod man sanda it voter’s assistance desk agud nga maeumo ro pag-usoy it mga pangaean.
Bangud sa kaabuon it mga polling precinct, nagbutang it mapa it eskwelahan sa Brgy. Manocmanoc, Balabag ag Yapak.
aminado man si Cahilig nga may pilang lugar sa Boracay ro ginabantayan it mga otoridad bangud sa banggi-anay it pilang mga kandidato.