Nagpangayo makaron si Commission on Elections (Comelec) Commissioner Marlon Casquejo it pasaylo sa owa pagpasugot it mga observers sa pag-imprenta it balota sa May 9 elections.
Bangud kara, ginpahayag ni Casquejo nga magapatigayun ro poll body it random ballot inspection para maayos ro presenteng sitwasyon.
Sa makaron, ginpahayag ni Casquejo nga pagapasugtan eon nanda ro mga political parties ag accredited citizen’s arm para magpili, mag-obserba ag mag-usisa sa mga balota.
Ginpahayag man ni Comelec commissioner George Garcia, igapatigayun ro random testing of ballots sa Huwebes.
Sa makaron, kapin sa 49.7 million ballots eon sigon ro naimprenta it NPO ukon katumbas it 78.7 percent it masobra 67.44 million ballots nga kinahang-ean sa May 9, 2022 elections.
