KALIBO, Aklan—Mabahoe ro pagpati it Commission on Elections ukon Comelec-Aklan nga owa eon it may matabu nga pagbawi it Certificates of Candidacy ag “substitution’’ it mga kandidato sa probinsiya.
Raya ro ginpahayag ni Crispin Raymund Gerardo, tagapaghambae it Comelec-Aklan.
Suno kana nga ko nagtaliwan nga mga inadlaw hay may mga nagpangutana sa andang taeatapan angot sa proseso it withdrawal and substitution, apang owa eon it naging follow-up.
Pagahueaton eon lang sigon sa Lunes nga adlaw, Nobyembre 15 ro mga development bangud nga raya ro ulihing adlaw it filing it substitution it mga partido agud nga bayluhan ro mga kandidato sa anuman nga posisyon para sa nagahilapit nga eleksyon sa Mayo 9, 2022.
Sa lunes man sigon pagataw-an it kahigayunan ro mga pulitiko nga ma-correct ro pilang mga impormasyon sa andang gindihon nga COC eabi eon ro pangaean nga gusto nanda nga makita sa mga balota.
Samtang, owa man sigon it mga ginakabig nga nuisance candidate sa Aklan.
Pagkatapos kara, paga-asikasuhon eon it komisyon ro pag-finalize it listahan it mga opisyal nga kandidato nga posibleng igapaguwa sa Disyembre.
