NATIONAL News — May una eon nga haeos 69 milyong rehistradong botante sa nasyon para sa 2025 midterm elections.
Raya ro ginpahayag it Commission on Elections (Comelec).
Ro pinaka-ulihing record it Comelec hay nagapakita nga 68,618,667 rehistradong botante sa bilog nga nasyon ro pwedeng magpasakop sa maabot nga boeutohan, kun sa siin ro Rehiyon IV-A ukon Calabarzon ro nagapanguna sa pinakamataas nga numero it mga botante nga 9,764,170.
Ginsundan raya it Rehiyon III (Central Luzon) nga may 7,712,535 nga mga rehistradong botante, National Capital Region (Metro Manila) nga may 7,562,858.
Ro nasambit nga numero hay mas mataas kaysa ko Mayo 2022 nga national elections nga may 65,745,526 nga botante ag ro eleksyon sa Barangay ag Sangguniang Kabataan ko Oktubre it nagtaliwan nga dag-on nga may 67,839,861.
Ro pagparehistro it botante sa bilog nga nasyon nga para sa eleksyon sa 2025 hay natapos ko Setyembre 30.
