KALIBO, Aklan—Sambilog pa eamang ro nailistang nag-eabag sa sang domingo nga pagpatuman it COMELEC gun ban sa bilog nga probinsiya it Aklan.
Suno kay Crispin Raymund Gerardo, tagapaghambae it COMELEC-Aklan, taga-banwa it makato ro naging buena manong naaresto nga gun ban violator, sa pihak nga owa raya nadakpan sa checkpoint.
Gindugang pa ni Gerardo nga padayun nanda nga pagapabaskugon ro pagbantay sa mga checkpoint kabulig ro kapulisan ag military agud nga makasiguro it matawhay ag maayos nga eleksyon sa Mayo 9.
Nasayuran 17 nga banwa sa Aklan ro simultaneous nga nagpatigayon it checkpoints nga gina-monitor it PNP, AFP ag COMELEC agud nga ipatuman ro resolusyon it poll body nga nagabawae sa pagdaea ukon pagbitbit it mga baril ag iba pang makamaeatay nga armas nga magabuhay hasta sa Hunyo 8.
Sa nasambit nga resolusyon, ginpaathag ni Gerardo nga suspindido anay ro tanan nga licensed firearm holders, juridical entities ag mga miyembro it government law enforcement agencies.
Ro mga naka-duty eamang sigon nga tawuhan it PNP ag AFP ro ginapasugtan nga magdaea it baril.
Kada domingo sigon hay nagapasa it assessment ro ginbilog nga municipal joint security assistance center nga ginaeakipan it mga opisyal it Comelec ag PNP.
Uman nga nagpanawagan si Gerardo sa mga security guard, panday, matansero ag iba pa nga aywan anay sa andang workplace ro andang mga gamit agud nga makalikaw sa multa tuga it ginapatuman nga gun ban.
Sa pihak nga parte, owa suno kana nakapaguwa ro komisyon it opisyal nga pangaena ag numero it mga kandidato nga makita sa mga balota.
