KALIBO, Aklan—Umpisa sa Pebrero 20, 2021 hay pagabuksan eon it Commission on Elections ukon Comelec ro voter registration kada Sabado nga adlaw.
Suno kay Mr. Crispin Raymund Gerardo it Comelec-Aklan nga mayad nga balita sa tanan nga mga indibidwal nga indi pwedeng magparehistro kada weekdays bangud nga kinahangean nanda nga magtrabaho bangud nga may una eon sanda nga option nga kada Sabado hay pwede eon nga magparehistro.
Ginpahayag dugang nga bukas ro mga opisina it Comelec umpisa alas- 8:00 it agahon hasta alas 5:00 it hapon.
Angot kara, gin engganyo nana ro mga pamatan-on nga magiging 18 anyos sa May 9, 2022 ukon antes ro Mayo 9 nga magpa-rehistro eon.
Ginhimo sigon ro Saturday registration agud nga maabot ro target nga mapataas pa ro numero it mga magapa-rehistro.
Angot kara, ginpahayag dugang ni Gerardo nga sarado ro mga Comelec offices kada adlaw it Lunes bangud nga gintaeana raya para sa pag-disinfect ukon disinfection day it mga taeatapan agud nga masigurong eowas ro mga empleyado ag magaparehistro kontra sa coronavirus disease 2019 (COVID-19).
Madumduman nga dati hay ginapatigayon ro voter registration umpisa Lunes hasta Huwebes umpisa alas 8:00 it agahon hasta alas 3:00 it hapon eamang.
Sa paghandum nga mas maabu nga mga botante ro magaparehistro rason nga nagdesisyon ro Comelec nga magpatigayon it Saturday voter registration ag pahabaon pa it daywang oras ro pagparehistro.
Suno pa kay Gerardo nga maskin nga pasado ro numero it mga nagapa-rehistro sa aklan para sa 2022 elections apang nagapabilin raya nga manaba kumpara sa target nanda hasta sa Setyembre 30, ro ulihing adlaw it voter registration.
Gin-insister it Comelec sa mga botante nga magparehistro agud nga ma-exercise ro kinamatarung nga makaboto sa nagahilapit nga eleksyon.
