KALIBO, Aklan—Gin-uman it Commission on Elections ukon Comelec-Kalibo ro andang panawagan sa mga kandidato it nagtaliwan nga Barangay ag Sangguniang Kabataan Elections nga owa pa nakapasa it andang Statements of Election Contributions and Expenditures ukon SOCE nga indi eon paghueaton ro 30 diyas nga deadline.
Ginpadumdum ni Atty. Christian Itulid, Municipal Election Officer it Comelec-kalibo eabi eon ro mga nagdaeaog nga kandidato nga magsumite eon it andang SOCE agud nga indi makaangkon it aberya sa andang pagpungko sa pwesto.
Sa makaron hay 17 pa eamang sigon ro nakapasa it SOCE sa andang taeatapan sa kabilugan nga masobra sa 600 nga mga kandidato.
Ginpaathag ni Atty Itulid nga base sa Republic Act No. 7166 ukon ro Synchronized National and Local Elections and Electoral Reforms Act, owa it sin-o man nga elected officials ro makapungko sa pwesto engkaso nga mapas-eawan nga maka-file it andang natungdan nga SOCE ukon posibleng indi eon raya mataw-an it tsansa nga makapa-ilihir it uman kon daywang beses eon raya nga gin obra.
Suno kana nga ro SOCE hay ro maid-id ag komprehensibong report angot sa gintau nga kontribusyon ag gingastos it sangka kandidato sa anang kampanya.
Ro ginapasugtan eamang sigon nga gastos hay limang piso kada botante.
Obligado suno ro mga kandidato nga mag file it andang SOCE sa Office of the Election Officer antes ukon sa mismong adlaw it November 29, 2023 ukon indi magsobra it sang buean pagkatapos it adlaw it eleksyon.
Tuyo kara nga mataw-an it kahigayunan nga ma-koreksyunan eagi ro mga saea kun sa siin owa eon it extension nga igatau.
