Ginahueat pa it Kalibo municipal police station ro commitment order maghalin sa korte agud nga ma-iremit sa Bureau of Jail Management and Penology ukon BJMP sa Brgy. Nalook, Kalibo ro gwardya ag suspek nga si Mark Archie Torrefiel, 31-anyos it Brgy. Cajilo, Makato.
Suno kay Police Major Jason Belciña, hepe it Kalibo municipal police station nga ginswab test eon si Torrefiel kahapon kon siin ginahueat eon lang kara ro anang resulta.
Engkaso sigon nga magnegatibo sa virus kadungan sa pagguwa it anang commitment order hay insigida imaw nga pagadaehon sa BJMP.
Apang, sa oras nga magpositibo sa covid-19 hay iga quarantine anay imaw sa pasilidad nga gintaeana sa may bahin it motorpool.
Ginpahayag dugang ni Major Belciña nga haom eon ro tanan nga dokumento nga kinahang-ean sa pagsueod kay Torrefiel sa presuhan.
Madumduman nga si Torrefiel hay nagapangatubang sa kasong Robbery with Homicide nga ginpasaka kana bangud sa brutal nga kamatayon it biktima nga si Bonna Hercia Ambay, 23-anyos, manager-reliever it RD Pawnsop Mabini St. Kalibo branch ag residente it Brgy. Nauring, Pandan, Antique.
