KALIBO, Aklan—Mabahoe ro maibulig it ginpatuman nga community quarantine agud nga matapna ro mas pang pagkalhit it coronavirus disease ukon COVID-19 sa nasyon.
Suno kay Dr. Nelly Sucgang, mas mayad nga kon may sintomas it sakit hay magpabilin anay sa sueod it baeay ukon mag-isolate sa kaugalingon nga kwarto.
Dapat man sigon nga i-separar ro mga ginagamit nga kutsara, pinggan, baso ag iba pang eating utensils sa iba pang miyembro it pamilya.
Importante suno kana ro social distancing kon nagaduda nga naga-angkon it nasambit nga sakit.
Kon indi malikawan, magsuksok it face mask, apang dapat nga ro interaction hay minimal eamang.
Ginlaygay pa ni Dr. Sucgang ro pirmeng paghugas it alima gamit ro sabon ag tubi sa sueod it 20 segundo.
Kon owa it tubi ag sabon, maggamit it alcohol-based nga sanitizer.
Likawan man ro pirmeng pagbuyot sa mata, ilong ag bibig eabi pa kon owa nahugasan ro alima.
Maggamit it disposable face mask ag siguraduhon nga ipilak raya it maayos.
Samtang, ginpahayag dugang nga bangud nga available eon ro mga test kits COVID hay eauman suno kana ro mas pang pagtaas it mga mailistang kaso it COVID-19.
Gin-engganyo man nana ro mga akeanon nga makipagbueuligan sa pagsukoe sa ginakabig nana nga world war 3, apang ro problema suno kana ro kaaway makaron hay invisible ukon indi makita.
