KALIBO, Aklan— Sa selebrasyon it Ati-atihan festival sa isla it Boracay hay uman nga nadugangan ro mga compliant hotels and resorts nga gintaw-an it permiso it Department of Tourism (DOT) nga pwedeng magbaton it turista ag bakasyunista.
Sa ginpaguwang listahan it DOT, naga-abot eon sa 305 establishments nga may kabilugang 10,515 rooms ro pwedeng maka-accomodate it mga bisitang gustong masaksihan ro dag-unang makolor ag masadyang festival nga sambilog sa mga ginabantayang aktibdidad it mga dumueoong makaron nga dominggo sa isla.
Samtang, kapin pa nga pagahugton it Department of Environment and Natural Resources (DENR) ro pagpatuman it laye sa palibot ag mga regulasyon agud nga mapabilin ro gin-umpisahang rehabilitasyon sa sikat nga isla nga gindayaw it kaeabanan ag iba pang mga accomplishments it ahensiya ko nagtaliwan nga dag-on.
Sa ginpaguwang mensahe it ahensya, ginpabugae ni Environment Secretary Roy Cimatu ro paglimpyo ag rehabilitasyon sa Boracay kon siin, raya ro naging “centerpiece” it andang mga accomplishments ko 2018 kabulig ro iba pang miyembro it Boracay Inter-Agency Task Force.
