KALIBO, Aklan–Pabor si Congresswoman Rowena Guanzon it P3PWD party list sa gintanyag nga reconciliation ni President Ferdinand “Bongbong” Marcos Jr. kadungan sa pagdumdum it ika-37 nga anibersaryo it EDSA People Power Revolution.
Apang suno kana nga nagakinahangean nga may kaeakip raya nga reconstitution ukon pagbalik it mga gintakaw nga manggad sa matuod nga nagapanag-iya.
Partikular nga gintumod kara ro pagtau it hustisya sa mga naging biktima it martial law.
Samtang, agud nga maipakita suno kana ro sensiridad sa gina-offer nga reconciliation , kinahangean nga bayaran eon it pamilya marcos ro estate tax nga naga-abot sa kapin sa 203 billion pesos.
Mabahoe nga bulig sigon ro nasambit nga kantidad sa kalisod nga ginapangatubang makaron it nasyon.
Nagpanindugan pa raya nga manami eamang nga pamatian ro anang offer apang kueang sa sinseridad ag substance.
Sa pihak nga parte, gindugang pa ni guanzon nga nagapakita eamang nga mahina ro education system sa nasyon bangud nga maabu ro nagapati sa fake news eabi eon ko tiempo it eleksyon.
Kasunod man raya it pilit nga pagbag-o sa kasaysayan eabi eon ro natabu ko Edsa People Power Revolution.
Ginbatikos man kara ro ora-orada nga pagpaguwa it memorandum angot sa pagsaylo it petsa it special non-working holiday nga imbes makaron hay kahapon ginpatuman.
Maabu suno kana nga naperwisyo nga mga estudyante ag trabaho bangud kara.
