KALIBO, Aklan—Owa gina-problemahan ni Aklan 2nd district congressman Ted Haresco ro pagbangga kana it anang igkampod nga si dating governor Florencio “Joeben” Miraflores sa maabot nga midterm elections sa Mayo .
Sa interview it Bombo Radyo, ginpahayag ni haresco nga posibleng gusto eon man ni Miraflores nga magbalik sa anang dating posisyon bilang representante it Aklan.
Nasayuran nga naghingabot sa ulihing adlaw it pagdihon it certificate of candidacy (COC) si Miraflores agud nga magpadaeagan sa nasambit nga posisyon.
Madumduman nga antes nga ginpasa ro anang posisyon bilang gobernador sa anang unga nga si Joen ko nagtaliwan nga eleksyon, nagdeklara si Joeben it anang pagretiro sa pulitika.
Gindugang pa ni Haresco nga nasubuan imaw sa naging desisyon it anang igkampod nga ginakabig man nana nga soul mate, apang owa sigon imaw it mahimo ag nakadepende eon sa mga pumueuyu ro pagdesisyon.
Ro anang re-election bid sigon hay suportado it national government rason nga magiging mas madali ro pagsueod it mga programa ag proyekto.
Nagapangunang handum nana nga mas pang mapa-umwad ro western side it probinsiya pinaagi sa pagpatigayon ag pagtukod it mga infrastructure projects kapareho it ana eon nga naumpisahan nga nagtau it dugang nga trabaho sa mga pumueuyu.
Plano pa nana nga dugangan ro mga scholarship programs ag libre nga hospitalization.
Bangud nga tumatak sa publiko ro “tawag ng tangalan”, sangka provincewide talent search, pagapadayunon nana raya kaibahan ro pagtau it pasidungog sa mga tampad sa serbisyo nga mga manugturo pinaagi sa Aklan’s Ten Outstanding Mentors ukon ATOM awards.
Si Haresco hay magapanerbisyo sa anang ikatlong termino .
