KALIBO, Aklan–Gintaw-an it punto ni Aklan 1st District Representative Carlito Marquez nga nagakadapat eon nga umpisahan ro pagsueong it Maharlika Investment Fund (MIF) bill.
Si Marquez hay sambilog sa 279 kongresista nga nagpabor sa nasambit nga proposisyon bangud nagapati imaw nga mabahoe ro maibulig kara sa pag-umwad it ekonomiya it Pilipinas.
Dapat sigon nga suportahan ro MIF bill bangud sa raya nga pamaagi hay mapaabu ro investors halin sa ibang nasyon kamana man nga makabulig raya sa national government nga makaangkon it dugang nga kita.
Nasayuran nga tuyo it MIF Bill nga tipunon ro pondo it government financial institutions ukon GFIs agud ikapital ag makabuoe it mas mabahoe nga kita nga imaw man ro igataeana sa mga pambansang programa ag proyekto it gobyerno kaparehas sa kuryente, agrikultura ag transportasyon.
Magaserbeng paunang pondo ro P50 billion halin sa Landbank of the Philippines, P25 Billion halin sa Development Bank of the Philippines ag 100% it dibidendo it Bangko Sentral ng Pilipinas kamana man ro napueong porsyento it gaming revenues halin sa PAGCOR ag iba pang government-owned gaming operators.
Nauna eon nga gin-aprubahan sa ikatlo ag ulihing pagbasa sa manabang kapueongan it kongreso ro nasambit nga proposisyon.
