Nag-apela it imbestigasyon si Aklan 2nd District Congressman Ted Haresco sa Senate blue ribbon committee angot sa eumugdang nga MT Princess Empress sa ginpatigayon nga press conference kasunod it pagbisita ni Senator Francis Tolentino ro chairman it Senate blue ribbon committee sa Probinsya it Aklan.
Bangud sa makangaeawa nga pagpasugot it Philippine Coast Guard sa pagbiyahe it nasambit nga motor tanker nga may sakay nga tole-tolenadang langis.
Raya hay sa pihak it kakueangan it pilang ka mga dokumento partikular ro pag-angkon it lisensya para makabiyahe.
Mabahoe sigon ro naging epekto it nasambit nga aksidente eabi eon gid sa sektor it pangisdaan.
Eubos nga ginakabaeak-an it kongresista ro magiging epekto kara sa mga isda sa Probinsya it Aklan nga sambilog man sa nagapangunang ginapangabuhian it mga pumueuyo.
Nagakadapat eamang sigon nga atubadngon ag bayaran it minatuod nga may saea ro naging danyos nga gintuga it oil spill.
Panawagan kara sa mga natungdan nga magpatuman it pagbawae nga makabiyahe sa mga luma eon nga mga motor tanker ukon vessels ag kinahangean sigon it hugot nga implementasyon angot sa mga ginapa-comply nga dokumento sa mga raya para malikawan man ro mga makarondayang aksidente.
Samtang, ginpasiguro man ni Senator Francis Tolentino nga padayon ro andang ginapatigayon nga maid-id nga imbestigasyon angot sa nag-eontad nga aksidente.
Sa makaron, owa pa sigon nanda natumod ro mismong rason it pag-eugdang it MT Empress apang klaro sigon para kanda nga aksidente ro nag-eontad nga pag-eugdang ag owa ginaeauman nga matabo.
