KALIBO, Aklan–Ginpasiguro ni Aklan 2nd District Congressman Teodorico Haresco nga pagataw-an kara it katumanan ro ap-at nga proyekto nga ginhinyu it Aklan Police Provincial Office (APPO).
Ginpahayag ni Congressman Haresco sa ginpatigayun nga blessing and turnover it patrol car makaron nga adlaw nga maeapit sa anang tagipusuon ro mga kapulisan rason nga eauman ro anang suporta sa mga programa ag proyekto it taeatapan.
Pila sa mga ginpromisa it opisyal hay ro pagtao it 250 Panalo Scholars para sa Aklan PNP command kung siin gintugyan kara kay Police Colonel Crisaleo Tolentino ro responsibilidad sa pagpili it mga benepisyaryo.
Ro mga mapaead suno kana nga makasueod sa congressional scholarship program hay pagataw-an it bulig kada an-om nga buean ag sigurado nga mataw-an it prayoridad sa trabaho sa paeaabuton.
Mag-euwas kara, may una man sigon nga pondo para sa health assistance it mga PNP personnel nga magapa-admit sa Aklan Provincial Hospital ukon West Visayas General Hospital kung siin eauman nga magiging zero balance ro andang bill.
Nasayuran nga kapin sa an-om nga vice chairmanship ro ginabuytan ni Congressman Haresco sa manabang kapueongan it kongreso rason nga medyo masako ro anang linyada.
