Eubos ro kalipay ni Sophia Therese Pamatian kat nakapasa imaw sa Geologist Licensure Examination 2023 nga naging top 8 pa sigon raya out of 350 nga ngabueo it examination.
Panugiron nana nga maliban sa homesick hay maabo man nga mga hangkat ro anang napangatubang samtang imaw hay nagatuon, pero bangud sigon sa suporta ku anang pamilya, mga abyan ag kakilaea hay nakayanan nana ruyon ag haabot gid ro anang handum.
Unga paeang sigon imaw hay hilig eun nana ro science nga subject imaw nga nagtinguha gid nga maging geologist.
Si Sophia ro pinakaunang geologist sa andang pamilya.
Pagsaysay pa it bag-ong geologist nga maabo ro fields it geologist ag pipilang eskwelahan malang sa nasyon ro naga-offer it makaraya nga kurso.
Padumdom nana sa mga nagahandum man nga maging madinaeag-on nga isipon gid it mayad ro kurso nanda nga gusto, magsakripisyo ag maglaan it oras para sa handum nga gusto maabot.
Masayuran nga DOST scholar man si Pamatian nga naging mabahoe nga bulig sa anang pagtuon sa pinansiyal nga aspeto.
Uwa man ginasara ni Pamatian ro puertahan ag oportunidad para magbueo it masters degree.
