Gin-aprubahan eon it House Committee on Constitutional Amendments ro accompanying bill ag committee report it Resolution of Both Houses No. 6 nga nagapatawag it Constitutional Convention para sa pag-amyenda it 1987 Constitution.
Sa botong 17 pabor, daywang mambalidha eamang nga miyembro it kumite ro bumoto it NO, raya hay sanday Gabriela Party List Rep. Arlene Brosas ag Senior Deputy Minority Leader ag Northern Samar Rep. Paul Daza.
Sa idaeom it nasambit nga hagna ro pagpatigayon it hybrid Con-con kung siin igaboto ag iga-appoint ro mga delegado.
Magaboto it sambilog nga representante maghalin sa existing legislative districts nga igapatigayon sa October 30, 2023, kadungan it Baranggay ag Sanggunian Kabataan Elections.
Ro appointed delegates mat-a ro pagapilion it Senate President ag House Speaker maghalin sa nagkaeain-eain nga sektor, kaibahan ro ginatumod nga basic sector sa RA 8425 ukon Social Reform Poverty Alleviation Act.
Sang buean antes matapos ro eleksyon sa Oktubre 30, ag pag-abot it November 20 hay igapatigayon ro unang pueong it Con-con delegates.
Pagabue-on man maghalin sa 2023 budget it COMELEC ro gastos para sa nasambit nga eleksyon.
Ginklaro man ni Cagayan de Oro Rep. Rufus Rodriguez, chair it komite nga posible sa gihapon aksyunan it senado ro hagna apisar nga owa pa raya it counterpart bill sa Matag-as nga Kapueungan.
Sa pihak nga parte, suno kay Kabataan Party List Rep. Raoul Manuel ginaeauman nga insigida rayang pagapasahon antes ro session adjournment sa March 23,2023.
