KALIBO, Aklan — Gin manduan it Department of Environment and Natural Resources (DENR) Region VI ro Provincial Environment and Natural Resources Office (PENRO)-Aklan nga magpagowa it cease and desist order (CDO) kontra sa under construction nga daywang paeapag nga multipurpose building sa isla it Boracay bangud sa page abag sa 25+5 meter easement rules.
Ro P4.98-million nga proyekto it LGU-Malay hay gin tukod maeapit sa baybayon sa Barangay Balabag.
Suno kay Executive Assistant to the Mayor Rowen Aguirre, ro ground floor it gina tukod nga building hay may public toilets ag washrooms samtang ro second floor hay pagagamiton nga command center para sa mga lifeguards ag detachment it Municipal Disaster Risk Reduction and Management Office.
Gin pamilit it PENRO-Aklan nga kinahangeang mauntat ro proyekto nga magatapos konta sa Mayo 27.
Ro taeatapan eamang sigon ro magataeana kun minatuod nga kinahangean ro istraktura ag kun may page abag sa kasuguan sa palibot.
Gin pahayag ni Aguirre nga base sa gina patuman nga ordinansa, gina pasugtan nga ipatukod ro anumang government structure maeapit sa baybayon kun raya hay eubus nga kinahangeanon.
