KALIBO, Aklan—Kapin sa 50% eon nga kompleto ro konstruksyon it bag-ong Kalibo public market sa Brgy. Andagao, Kalibo.
Suno kay municipal engineer Amalia Francisco it lokal nga gobyerno it Kalibo nga ro target date of completion kara it contractor hay sa Agosto 31, 2025.
Natengga suno kana it haeos pilang buean ro konstruksyon bangud sa pagpamalibad it pilang vendors nga magsaylo sa gintaeana kanda nga relocation site sa eastern side terminal sa San Lorenzo Drive.
Dugang pa ni Engr. Francisco nga dapat hay natapos eon ro proyekto kato pang Mayo 28, 2024.
Posibleng sa mga buean it Abril ag Mayo hay makita eon ro development kara bangud nga natapos eon ro pagbuhos it tanan nga pundasyon.
Engkaso nga uman nga makaangkon it delay raya hay tuga eamang it maeain nga daeagan it paniempo.
Ro proyekto hay may pondo nga kapin sa P300-million.
Sa oras nga matapos, mataw-an kara it katumanan ro handum it kalibonhon nga makaangkon it malimpyo, manami , ag moderno nga lugar nga sentro it komersyo.
Makita kara ro three-story building nga matsa market-mall nga may nagakaigo eon nga parking space sa ground floor kaibahan ro mga stalls para sa meat, vegetables, fresh fruits, fish ag poultry products.
Sa second floor, makita ro mga stalls para sa dry goods ag ro 3rd floor hay open space for rent.
Makita man sigon sa bag-ong tindahan ro park ukon plazoleta.
Kapareho it ibang mga moderning merkado publiko, raya hay may nagakaigo man nga escalator ag elevator para sa mga ginahakot nga produkto.
