KALIBO, Aklan — Ginpasiguro it contractor nga Rotaflex Construction Development Corporation nga masarangan nanda nga matapos sa Pebrero 27, 2026 ro construction it bag-ong Kalibo public market.
Raya ro ginpahayag ni Sangguniang Bayan member Raymar Rebaldo kasunod it andang ginpatigayon nga site inspection ko nagtaliwan nga domingo sa pagpanguna it Committee on Infrastructure .
Suno kana nga tuyo it andang inspection nga masiguro ro progreso ag kalidad it konstruksyon.
Ro Kalibo public market hay may kabilugan nga pondo nga P300 milyon apang ginasugid nga kapin sa P78 milyon pa eamang ro nagastos.
Sa ginpatigayon nga inspeksyon, napas-eawan ro head engineer nga si Jeffrey Mendoza nga makapakita kanda it program of works.
Pahayag dugang kara nga nagduha-duha sanda nga magsipot sa ginpatawag nga committee hearing bangud sa gingamit nga kataga nga “in aid of legislation” imbes nga “in aid of clarification” eamang .
Ginaboeobanta nga ro proyekto hay una eon sa 60% nga completion ag ginaeauman nga matapos sa gintaeana nga tiempo.
Ro focus it presenteng phase it konstruksyon hay ro pagbuhos sa second floor, kun sa siin ginpasiguro nga matibay ro mga steel deck agud nga malikawan ro pag-un-un kapareho it natabu dati.
Sa pihak nga parte, engkaso nga magtambong eon sa committee hearing ro pamunuan it Rotaflex, handum it opisyal nga makatambong ro mga katapo it media agud nga mabuligan sanda nga makatau it ensaktong impormasyon sa publiko agud nga malikawan ro mga nagkaeain-eain nga espekulasyon.
Ginklaru man ni SB Rebaldo nga owa imaw it ibang intensyon sa anang ginahimo nga tikang kundi nga mapamayad ro nasambit nga proyekto.
Samtang, ginkumpirma dugang it opisyal nga naispatan sa andang inspeksyon ro kontrobersiyal nga si Engr. Rhea Kasandra De Vera nga nauna eon nga napabalita nga gin-relieve bilang site engineer kasunod it ginakaeakutan nga isyu kontra sa mga nag-alsa nga construction workers.
