KALIBO, Aklan—Gin-umpisahan eon ro construction it temporaryong stalls sa central portion it nasunog nga Kalibo public market.’
Suno kay market supervisor Abel Policarpio nga ro temporary stalls hay himo sa light materials ag pagabutangan eamang it sangka bubong nga pagagastusan it lokal nga gobyerno it Kalibo.
Tuyo kara nga indi eon magamit bilang relocation site it mga apektadong negosyante ro katunga it karsada it Toting Reyes St. Kalibo agud nga makalikaw sa paggutok it daeagan it trapiko ag makabig man nga health hazard.
Ginapatihan nga makabalik eon sa dating pwesto ro kapin sa 132 nga mga vendors antes mag-paskwa ukon sa Disyembre 25 it makaron nga dag-on.
Apang bukon it kapareho it dating sukat, ginpa-isot raya sa dos por tres metros kwadrado.
Samtang, gindugang pa ni Policarpio nga posibleng makaangkon it “pay parking” sa sueod mismo it tindahan kasunod it reklamo it mga tricycle ag motorsiklo nga nagapamakae.
Samtang, aminado si Policarpio nga apektado it natabu nga sunog ro income it LGU-kalibo kasunod it pagsuspinde sa pagbayad it stall rentals it mga apektadong negosyante.
Bangud kara, ginaeauman nga mapas-eawan nanda nga maabot ro andang target income makaron nga 2019 nga P29 million.
Haeos 50 porsiyento sigon it kabilugan nga income it Municipal Economic Enterprise Development Office ukon MEEDO-Kalibo hay nagahalin sa Kalibo public market.
