KALIBO, Aklan — Paga umpsahan eon sa madason nga dominggo ro construction it mga karsada sa isla it Boracay.
Suno kay Engr. Fritz Ruiz, chief planning and design section it Department of Public Works and Highways (DPWH)-Aklan nga raya hay matapos naipagowa eon it Department of Budget and Management (DBM) ro kaparte it nakataeanang pondo nga naga abot sa P490-million.
Sakop sigon it initial budget ro road construction maghalin sa Cagban Port hasta sa Crown Regency Prince Resort sa Station 2.
Ro iba pang pondo hay gin taeana para sa paga himuong karsada sa Barangay Yapak.
Suno kay Engr. Ruiz nga target nandang matapos ro kapin sa 70 porsyento it road widening projects sa sueod it an-um nga bueang paglimpiyo ag rehabilitasyon sa bug-os nga isla.
Sa makaron sigon hay naga padayun ro pag-demolish sa pilang mga istraktura nga nakasueod sa 12-meter road easement.
Mag eowas sa P490 million, may gin taeana pa sigon ro DPWH nga P92 million para sa relocation it mga poste it kuryente it Aklan Electric Cooperative (AKELCO).
Mag eowas kara, nakipag-angot eon sanda sa daywa pang water utilities sa isla agud mapadasig ro pagbutang it andang mga tubo sa main road.
