KALIBO, Aklan — Kapin sa 65% eon nga kompleto ro konstruksyon it bag-ong Kalibo Public Market sa Brgy. Andagao, Kalibo.
Suno kay market supervisor Noe Pador nga adlaw ag gabi-i ro pag-trabaho makaron agud nga makahingabot sa target date of completion nga Pebrero 2026.
Bangud nga pre-fabricated ro istraktura it building, nakataeana eon sigon nga iga-transport sa construction site ro mga structural components kapareho it pader, saeog ag modules nga iga-install sa anang “base” ukon frame.
Ginatinguhaan sigon it lokal nga gobyerno nga matapos eon ro proyekto agud nga mataw-an it kasoehayan ro parehong mga vendors ag mga bumaeakae nga nabudlayan sa andang relocation site sa eastern side terminal sa San Lorenzo Drive nga masyadong mapiot.
Ro proyekto hay may pondo nga kapin sa P300-million. Pahayag pa ni Pador nga sa oras nga matapos ro bag-ong tindahan hay mataw-an kara it katumanan ro handum it Kalibonhon nga makaangkon it malimpyo, manami , ag moderno nga lugar nga sentro it komersyo.
Makita kara ro three-story building nga matsa market-mall nga may nagakaigo eon nga parking space sa ground floor kaibahan ro mga stalls para sa meat, vegetables, fresh fruits, fish ag poultry products.
Sa second floor, makita ro mga stalls para sa dry goods ag ro 3rd floor hay open space for rent.
Makita man sigon sa bag-ong tindahan ro park ukon plazoleta. Kapareho it ibang mga moderning merkado publiko, raya hay may nagakaigo man nga escalator ag elevator para sa mga ginahakot nga produkto.
Market supervisor Noe Pador
